Шағала

Көк теңіздің шағаласын сүйдім мен,

Қиқуына қайран қалдым жағада

Қанатыңды әсте оққа күйдірмен,

Қалықтай бер,шарықтай бер,шағала

Оу,шағала,нең бар еді ұмытқан,

Неге, неге кетпей қойдың төбемен?!

Анау жерде бар ма еді жұмыртқаң,

Қой, қам жеме, мен төбемен өлеңмен.

Сипай берші толқынның көк шаштарын,

Көкірегі толып тұрған күй, аңыз.

Асты кең ғой мөлдіреген аспанның,

Кұс та адам да бәріміз де сыямыз

Таң

Мамық төсек құс жастықты қатар сап,

Пай-пай,шіркін!

Ұйқы қимай жатар шақ!

Таң келеді,таң келеді тамылжып,

Арман не,дос ,бәз де таң боп ата алсақ....

Жұпар сіңген таңның алды тып-тыныш,

Шөп басында мөлтілдейді шық-күміс

Қыз қызарып, тез-тез басып үйге енді,

Шыршаларға шықылықтап шықты құс

Қызғылт,сары...мың бояуға малынып,

Дала жатыр.Таң шапағы –сан үміт!

Тұрмын қарап қырық бірінші жыл құсап

Атпаса деп қара бұлтты жамылып

Жүрегім

Өмірдің абат бағында

Жүрсем ,сен жанға сыймайсың.

Ойға бір шомған шағымда

Кеудемді бұлқып қинайсың.

Балауса балғын шалғында,

Тербеліп тұрдың самалдай.

Қырмызы қыздың алдында

Қиылдың амал таба алмай.

Ошақта қалған оттай боп,

Жыр болып жандың бұрқырап.

Батырлар атқан оқтай боп

Жауға да төндің зырқырап.

Жүрегім-түпсіз теңізім,

Жүрегім-өмір өзегім!

Жоқ демен сенің егізің

Ол-мынау жайсаң өз елім!

Әркімде де жүректен-

Ақиқат,бір-бір енші бар.

Сөкпеңдер!

Егіз жүрекпен

Жұлқынып жүрген мен шығар!

Елім

Өзің мені құндақтаған,

Құндақтау да ғажап ұғым.

Кішкентайдан күн қақтаған,

Қырдың құрыш қазағымын.

Ауаңды еркін жұтамын мен,

Мамық төсек,майса белім.

Сен-бәйтерек,бұтағыңмын-

Бел балаңмын,жайсаң елім.

Жас дәурен

Сұлуларға табындық,табынбадық,

Дос табарда жаңылдық,жаңылмадық,

Кете бердік ілгері дабыл қағып,

Дамылды күнде бұзған жас дәурен-ай!

Дүбірледік, дүлей ек,арман қудық,

Шын айтуға жаралдық,ардан тудық.

Көтердік біз жүректі алға Ту қып,

Думаны күнде қызған жас дәурен-ай!

Телегейде теңселіп,сең кешіппіз,

«Восток»- космос тұлпарын жемдесіппіз,

Әлем сүйген батыр боп енлді өсіппіз,

Тағдырды жұлқылаған жас дәурен-ай!

Хаттар

Жеткенде хаттар маған байлап қанат,

Жүректе дерт қалмайды,қайнап талап.

---

Сол сәтте бұлттан шыққан күнлей болып,

Қаламын тіршілікке жайнап қарап.

Бір хатта мөлт-мөлт еткен жас тұрады,

Бір хатта білгір,дана бас тұрады.

Бір хаттар...еңбектеген сәбиімнің

Аяғын апыл-тапыл бастырады.

Кей хабар бір күн келмей,бір күн келіп,

Кетеді көңілге аз-кем кірбің беріп.

Тынышым қалмайды онда,

Барша адамның

Тезірек амандығын білгім келіп.

Жеткенде хаттар маған байлап қанат,

Жүректе дерт қалмайды,қайнап талап.,

Сол сәтте бұлттан шыққан күндей болып,

Қаламын тіршілікке жайнап қарап.

Бөбегім

Тәттісін айтсаңшы бөбектің

Аядай құшаққа сыятын.

Ол өзі өзгеше бөлек Күн,

Жаныңа жаз нұрын құятын.

Айтсаңшы томпаңдап жүргенін,

Бақшаға барғанда жетелеп,

Көрмесек бөбектің күлгенін,

Өмірден қызықсыз қтер ме ек?!

Самолет аспанда қалқыса,

Қақса да қарлығаш қанатын,

Самал де бетіңе щалқыса,

Мәз болып,бөбегім қаласың.

Машина бұрылса бұрыштан,

Кетесің шофер боп гүрілдеп.

Қашан да оралсам жұмыстан,

Бауырыма қысамын гүлім деп.

...Зәулім үй.Кранға құмарсың,

Қарайсың,желпілдеп тұлымың,

Ертең-ақ шығанға шығасың,

О,менің,кішкентай құлыным.

Сені іздедім

Ақ таңның арайынан,

Саф-сезім сарайынан-

Сені іздедім!

Балбұлақ базарынан,

Толған ай ажарынан-

Сені іздедім.

Соқпақтар сарасынан,

Маржандар арасынан-

Сені іздедім!
Мақпал-түн көрпесінен,

Армандар өлкесінен-

Сені іздедім!

Жүйріктің жетегінен,

Нәзіктік мекеннен-

Сені іздедім!

Мұнара бастарынан,

Мөлдірлік дастанынан-

Сені іздедім!

Аққудың қанатынан,

Ақ бұлттар қабатынан-

Сені іздедім!

Сандуғаш әнінен де,

Қымыздың дәмінен де-

Сені іздедім!

Сені іздеп көз қарайып,

Майысқақ талға қондым.

У жайын қозғамайық.

Сен шырын балда болдың!

Айна

Өзіңе өзің қызығып,

Зиян ба,әлде пайда ма?

Отызға дейін сызылып,

Қараумен келдің айнаға.

Қылымсып әнтек бөліндің,

Тотыға ұқсап топ құстан.

Қызығып кештің өмірдің,

Көбелек сынды от құшқан.

Аясам сені оғаш па,

Айнаға қарап кешпе күн.

Неге сен,қалқам,о баста

Анаңа қарап өспедің?!

Сүйінші

Сұлу таң киіз үйге сәуле шашты,

Түңғышы жас ананың есік ашты.

Жиылып көрші-көлем,көңіл шалқып,

Әсем әже шай қойып,қазан асты.

Жас әке түні бойы қойда жүрді.

Әзірше естіген жоқ жайдары үнді.

Сезіп қап жақсылықты қара бала

---

Желпініп,ер-тоқымсыз тайға мінді.

Құйғытып бетке ұстады қара дөңді,

Құйынның құйрық жалғап барады енді.

-Ей,аға,сүйінші бер,сүйінші бер,

Өмірге тағы да бір қойшы келді!

Көңіл

Ертеңім қызық көрмеген,

Ертеңім саған ғашықпын.

Сырым бар кеуде кернеген,

Жыр қылуға асықпын.

Заманым,ұшқыр дүлдүлім,

Сенімен алға жол асам.

Сен үшін жырдың түндігін

Шалқайтып ашам,мол ашам.

Шырқау ең неткен,арманым,

Жаныма тидің қамшы боп.

Үмітті алыс жалғадым,

Теңізге құям тамшы боп.

Жаяу бір адам тәрізді

Баяуларды жек көрем

Отаным,үлкен парызды

Өткерем бе деп келем!

Көктем

Өпті де көктем бұтағын,

Бәйтерек жасыл боянды.

Септі де көктем жұпарын,

Ұйқыдан дала оянды.

Қайыңдар баяу ырғалып,

Орандай бөртпе шарқатты.

Арудай бір сәт сыланып,

Үйеңкі бұрым тарқатты.

Қиядан ойға жүгіріп,

Сылқылдайды бұлақтар.

Келдің бе көктем жүгініп,

Көңілде саған тұрақ бар.

Бал бұлақ

Ақ шәлілі тау басынан

Ақты бұлақ құлдырап.

Артист қыздың сырғасынан

Айнымайды сылдырап.

Сен бе дедім шын арғымақ,

Жүйріксің-ау,бал бұлақ.

Әуеніңді дәл қағып ап,

Кетті жүрек ән құрап.

Құлшыныс

Өтті соғыс…

Тойыңды ғой қарын да,

Шоқтай жанып киінеді жарым да,

Қалай бірақ қалыңдасын қабырғам,

Баста мынау жалғыздықтың барында,

Соғысты айтса-

Солқылдайды бар маңдай,

Сұр жыландар бас көтеріп алғандай.

Сонда есіме жалғыздығым түседі,

Жетім біткен маған қарап қалғандай.

Жалқы едім мен,

Содан көңілім кіршің бе,

Оу,дүние,қарымтам көп бір сенде,

Жалғыздарға жал бітіргім келетін

Өз-өзімен ауыса алмай жүрсем де.

Біздің буын мылтық ұстап,кешпеді от,

Жалғыздық па-көкіректі тескен оқ?

Сұм соғыстың сойқандары әлі есте,

Ал,әкемнің түр-түсі де есте жоқ.

Және тағы ағадан жоқ дерек те,

Кешіріңдер,

Мұңға батсам мен ептеп.

Құлшынам мен солардың да есесін-

Екі еселеп қайтаруым керек деп!

Көргем жоқ

Жақсыны көрдім-

Жарамсақтарға алданған.

Жаманды көрдім-

Жақсының атын малданған.

Бақытты көрдім-

Артында бұққан қайғысы,

Не көрмейді Адам

Осынак жалпақ жалғаннан?!

---

Батырды көрдім-

Тағдырдың шалған үсігі.

Ақынды көрдім-

Қашалған тастан мүсіні.

Бірақ та,бірақ жалғанда шалқар шаттықтан

Көргем жоқ әлі жарылып өлген кісіні.

---

Смотрите также файлы

• План урока Географическое положение и состав района.pptx

• 1. теоретические основы анализа движения денежных средств предприятия 5.docx

• Андреевское в xviii xix веках.docx

• В советском Союзе государственные органы контролировала партийносоветская номенклатура в лице Политбюро и Центрального комитета Коммунистической партии Советского Союза (цк кпсс)..rtf

• Показатели вариации интервального ряда числа падения кукурузной муки тонкого помола.docx